Período: 01.01.2018 – 31.12.2021
O proxecto MATES é unha alianza estratéxica sectorial, acción que se engloba dentro do programa Erasmus+, que ten como obxectivo desenvolver unha estratexia de competencias que aborde os principais motores de cambio da industria marítima, en particular a construción naval e as enerxías renovables en alta mar.
Coordinador: CETMAR (Centro Tecnolóxico do Mar; Vigo, España)
O seu coordinador é o CETMAR (Centro Tecnolóxico do Mar; Vigo, España) e conta coa participación de 17 socios situados en 8 países. A súa natureza é variada pois inclúe tanto empresas, asociacións profesionais, administracións públicas, universidades e centros de Formación Profesional entre outros. O total do orzamento asignado ao proxecto é de 4’9 millóns de euros.
Un dos seus socios é, precisamente, a Consellería de Educación da Xunta de Galicia, que, á súa vez, coordina as actividades para desenvolver no proxecto por parte de 3 centros educativos, un dos cales é o CIFP Someso.
A validación das accións e prioridades suxeridas pola estratexia de competencias mediante o establecemento de 11 estudos de casos piloto. Estes estudos de caso poñerán a proba os conceptos de MATES sobre as competencias dixitais, as competencias ecolóxicas, a mobilidade, a xestión da innovación, o desenvolvemento dos plans de estudo e a alfabetización oceánica.
O papel do CIFP Someso é, precisamente, a execución dun destes casos piloto, o denominado Efecto Magnus.
Este piloto ocúpase dos sectores da construción naval e as enerxías renovables offshore, pois a fabricación de estruturas en alta mar utilizadas na industria eólica é un traballo que se está levando a cabo recentemente en estaleiros e empresas locais constituíndo unha liña de negocio emerxente e en auxe. Proba diso son os diversos proxectos realizados nas instalacións de Navantia Fene nestes últimos anos.
As “ jackets” offshore permiten aos estaleiros ampliar o seu ámbito de negocio porque as necesidades dos seus procesos produtivos encaixan perfectamente coa súa actividade tradicional e permítelles aproveitar as sinerxias existentes entre ambos os tipos de produtos: barcos e estruturas offshore.
O obxectivo deste piloto é construír unha “jacket” eólica mariña a escala, co obxectivo xeral de promover as enerxías renovables entre os estudantes de FP, en particular, a enerxía eólica e mariña.
O propósito específico detrás deste piloto é a aplicación, nunha contorna educativa, de novos sistemas de fabricación e construción existentes no campo das construcións metálicas offshore. Para iso se replicará a construción dunha “jacket” de acordo cos estándares e procedementos da industria adaptados ás nosas circunstancias.
Paralelamente, a fin de incluír as novas tecnoloxías asociadas á industria 4.0 e iniciar ao alumnado nas súas potenciais vantaxes e prestacións, prevese a implementación dunha solución de realidade virtual do proceso de pintado da estrutura.
Por último, e como complemento destas actividades, construirase un prototipo dun aeroxerador baseado no efecto Magnus a fin de crear o par motor que orixine o xiro do rotor. Así mesmo, impartiranse conferencias para estudantes e profesores de FP centrados en tecnoloxías e aplicacións afíns a estas cuestións.
O aspecto innovador deste piloto radica na estreita colaboración entre institucións, é dicir, estaleiros, empresas auxiliares e o centro de FP, o que permitirá unha transferencia directa de coñecementos da industria á próxima xeración de traballadores, así como o traballo por proxectos a desenvolver no centro educativo.